Emperador romanu

Esti artículu o seición necesita referencies qu'apaezan nuna publicación acreitada, como revistes especializaes, monografíes, prensa diaria o páxines d'Internet fiables. Pues añadiles tu mesmu o avisar al autor principal del artículu na so páxina d'alderique pegando: {{subst:Avisu referencies|Emperador romanu}} ~~~~

Emperador romanu ye'l términu utilizáu polos historiadores pa referise a los gobernantes del Imperiu romanu tres el final de la República romana.

Na antigua Roma nun esistía'l títulu d'Emperador Romanu, siendo esti más bien una abreviatura práutica pa una complicada xunta de cargos y poderes. A pesar de la popularidá actual del títulu, el primeru n'ostentalo realmente foi Miguel I Rangabé a principios del sieglu IX, faciéndose llamar Basileus Rhomaion ("Emperador de los romanos"). Hai que tener en cuenta que naquella dómina'l significáu de Basileus camudara de "soberanu" a "emperador". Tampoco esistía nengún títulu o rangu análogu al títulu d'Emperador, sinón que tolos títulos asociaos tradicionalmente al emperador teníen el so orixe na dómina republicana.

El discutiniu sobre los emperadores romanos ta influyíu en gran midida pol puntu de vista editorial de los historiadores. Los mesmos romanos nun compartíen el modernu conceutu monárquicu de "Imperiu" y "Emperador". A lo llargo de la historia, l'Imperiu Romanu caltuvo toles instituciones polítiques y les tradiciones de la República Romana, incluyendo'l Senáu y les asamblees.

Polo xeneral, nun puede describise a los emperadores como gobernantes de iure. Oficialmente, el cargu d'emperador yera consideráu como'l "primeru ente iguales" (primus inter pares), y munchos d'ellos nun aportaron a gobernantes de facto, sinón que frecuentemente fueron simples testaferros de poderosos burócrates, funcionarios, muyeres y xenerales.